Crowe se vrou kry R219 miljoen
2012-10-16 16:01
Los Angeles – Russel Crowe se vrou gaan glo minstens $25 miljoen (sowat R219 miljoen) uit hul egskeiding kry.
Die Gladiator-akteur en Spencer, sy vrou van die afgelope nege jaar, het vandeesweek hul egskeiding aangekondig.
Volgens die Sydney Morning Herald is die paartjie se eiendom alleen $50 miljoen (sowat R437 miljoen) werd, insluitend ‘n herehuis van $14 miljoen (sowat R122 miljoen) in Sydney
Die koerant het bereken dat Crowe al sowat $150 miljoen (sowat R1,3 miljard) verdien het uit rolprente sedert die paartjie 22 jaar gelede ontmoet het. Crowe het ook ‘n hele aantal sakebelange.
Redes vir die paartjie se skielike egskeiding is nog nie bekend nie.
Gerugte het die ronde gedoen dat Spencer 'n bietjie te ingenome geraak het met haar dansmaat op Australië se Dancing With the Stars, maar beide Crowe en Spencer het ontken dat Damian Whitewood meer as net ‘n vriend is.
Die Oscar-wenner se werkskedule kan ook ‘n faktor wees. Crowe was die afgelope tyd ontsettend besig om aan rolprente te werk. Altesaam ses rolprente van hom sal binne die volgende jaar vrygestel word. Die rolprente sluit in The Man with the Iron Fists, Les Miserables, Broken City, Man of Steel, Noah en Winter's Tale.
– Channel24
– Volg Nuus24 op Twitter
