Cowell hark meeste in op VSA tv
2009-11-11 12:11
Los Angeles – Simon Cowell, die bekende American Idol-beoordelaar, is die bes betaalde man op Amerikaanse televisie.
Die finansiële publikasie Forbes.com het Dinsdag berig die aanbieder het ‘n geskatte waarde van $75 miljoen (sowat R551 miljoen).
Die 50-jarige Cowell het Donald Trump van The Apprentice-faam - met ‘n waarde van $50 miljoen (rondom R368 miljoen) - geklop, asook mede-aanbieder Ryan Seacrest met sy $38 miljoen (R279 miljoen).
Die syfers is vir die tydperk vanaf 1 Junie 2008 tot 1 Junie 2009 bepaal, en is voor belastingaftrekkings.
Cowell het sy eie platemaatskappy, wat al sangers soos Leona Lewis en Susan Boyle aan boord gebring het.
American Idol is die VSA se gewildste tv-program vir die afgelope sewe jaar.
Charlie Sheen, die ster van die sitkom Two and a half men, het die top vyf gehaal met ‘n waarde van $21 miljoen (R154 miljoen).
Steve Carell van The Office is in die vyfde plek met ‘n waarde van $20 miljoen (R147 miljoen).
Die res van die in die top 10 is:
6. Howie Mandel - $15 miljoen (R110 miljoen);
7. Kiefer Sutherland - $13 miljoen (R96 miljoen);
8. Jeff Foxworthy - $11 miljoen (R81 miljoen);
9. Hugh Laurie $10 miljoen (R74 miljoen);
10. David Caruso $9 miljoen (R66 miljoen).
- Reuters