Clooney onthul sterre vir Haiti-konsert
2010-01-18 10:18
Beverley Hills – Die Hope for Haiti fondsinsamelingskonsert vir slagoffers van die aardbewing in Haïti sal optredes deur Bono, Sting, Justin Timberlake, Christina Aguilera en Alicia Keys insluit, het George Clooney gesê.
Volgens Clooney, wat by die Golden Globe-toekenningseremonie met verslaggewers van die Associated Press gepraat het, sal meer as 40 bekendes die vertoning op 22 Januarie bywoon.
Hy het bygevoeg dat die doel van die fondsinsameling is “om die mense van Haïti te wys dat die hele wêreld omgee vir hulle.”
Clooney en Wyclef Jean, wat in Haïti gebore is, gaan die aanbieders wees van dié vertoning wat in New York aangebied word.
Die geld wat ingesamel word sal aan die Rooi Kruis, Unicef, Oxfam Amerika, Partners in Health en Jean's Yele Haiti Foundation gaan.
- AP