Choreografie beste van nuwe Footloose
2012-01-10 08:06
Footloose
Met: Kenny Wormald, Julianne Hough en ander.
Regie: Craig Brewer
****
Vergelykings is soms onregverdig, maar as ’n fliek toneel vir toneel “oorgedoen” word, kan die vervaardigers kwalik maak of dit hulle verras.
Die eerste Footloose (1984) was hoegenaamd geen meesterstuk nie, maar het ’n uitbundige bekoring gehad.
Daar is baie mense wat dit onthou met ’n effens verleë dog nostalgiese glimlaggie.
Dit het onder meer die volgende gebied: Kevin Bacon, wat steeds ’n gerekende akteur is, ’n lekker klankbaan wat baie dinge omtrent die 1980’s netjies vasvat (Hallo, Bonnie Tyler! Hallo, onthoubare kenwysie!) en wavragte energie.
In hierdie nuwe weergawe het ons in die hoofrol Kenny Wormald, wat anders as Bacon nie oor amper drie dekades nog ’n plekkie in die kollektiewe bewussyn sal hê nie.
Hy speel Ren McCormack, wat na ’n klein dorpie trek waar ruk-en-rol verbied is. Ren is van nature ’n rebel en wil die saak regstel. Laat die dansery begin.
Met so ’n yl intrige hang alles af van die aanbieding – en dis bloot gangbaar. Wormald is eintlik ’n danser, en kom ons sê maar as akteur maak hy ’n goeie danser uit. Die country-agtige nuwe weergawes van die ou treffers is ’n pyniging. Die dansery is nou meer modern en die goeie choreografie bring darem troos.
Vir kits-, vergeetlike vermaak kan dit wel op ’n stil aand die ding doen. Loslit mag dié poging wees, daar is net te veel voetfoute.
* Tydsduur: 113 minute. Ouderdomsperk: 13TG.
– Volg Nuus24 op Twitter.
- Volksblad