China: Geen kaal troufoto’s, asseblief
2010-11-12 13:22
Shanghai - ‘n Handelsvereniging van troufotograwe in China vra vir ‘n verbod op naakfoto's van pasgetroudes – ‘n nuwe gier onder die land se jong paartjies.
Die Shanghai Trouehandelsvereniging sê dié praktyk toon nie respek vir die instelling van die huwelik nie en het gewaarsku hulle sal die regering vra om enige ateljee wat sulke foto’s neem te verban, het die Shanghai Daily News Vrydag berig.
“Ons beveel nie sulke troufotograwe aan nie, aangesien hulle nie staan by die konserwatiewe tradisies van Chinese mense nie,” het die vereniging se adjunkpresident, He Lina, luidens die berig gesê.
“Troues behoort heilige seremonies te wees, so ons hoop jong mense kan respek toon.”
Anders as in die Weste, word Chinese troufoto’s gewoonlik maande vóór die seremonie geneem en poseer die paartjies gewoonlik in Westerse- en Chinese uitrustings.
Sommige ateljees het begin om die paartjies ‘n opsie te bied om hulself sonder enige klere af te neem, of met lakens of ander voorwerpe in strategiese plekke.
Liu Chunquan, ‘n prokureur, het aan die koerant gesê daar is niks onwettigs daaraan om naakfoto’s te neem nie, maar het gesê enigiemand wat sulke foto’s in die openbaar versprei kan van pornografie-verwante oortredings aangekla word.
Sommige van dié naakfoto’s is reeds op die internet versprei.
Aanhangers van dié soort foto’s sê weer dit vang ‘n paartjie se liefde vir mekaar en intimiteit vas.
- Volg Nuus24 op Twitter
- Sapa - AFP