Charlize dalk Diana in een van 3 flieks
2012-02-12 07:06
Kaapstad – Drie flieks oor die lewe van prinses Diana word binne die volgende twee jaar bekend uitgereik.
Naomi Watts, bekend om King Kong, het pas gehoor sy gaan die rol van die prinses vertolk in Caught in Flight. Dié fliek gaan fokus op die twee jaar voor Diana se dood in Augustus 1997. Oliver Hirschbiegel is die regisseur.
Charlize Theron is steeds die voorloper om die hoofrol in ’n ander fliek oor die lewe van prinses Diana. Carey Mulligan is die ander aktrise wat oorweeg word.
Die fliek is gegrond op Ken Wharfe se boek Diana: Closely Guarded Secret en gaan fokus op die jare voor haar egskeiding van prins Charles.
Dit gaan £30 miljoen (sowat R358 miljoen) kos en in 2013 uitgereik word.
Die kans is goed dat Ewan McGregor die rol van Wharfe, ’n voormalige lyfwag, gaan speel.
Wharfe het agt jaar lank die prinses se seuns, William en Harry, opgepas voordat hy dié omstrede boek in 2007 gepubliseer het.
Stephen Evans is as die regisseur aangewys. Hy het onlangs sy staal gewys met die sukses van The Iron Lady oor die voormalige Britse premier Margaret Thatcher.
Die fliek gaan nie melding maak van haar verhouding met Dodi AlFayed of al die verskillende teorieë oor haar dood in ’n motorongeluk in Parys in 1997 nie.
“Die doel is nie om te sê Diana was ’n ongelooflike vrou of sy was ’n pyn in die nek nie; die gehoor moet self besluit,” het Evans gesê.
Die derde fliek is Diana. Keira Knightley en Scarlett Johansson ding nog mee om dié hoofrol.
Bronne: www.timesofindia.com; www.sheknows.com; www.cbsnews.com
Volg Nuus24 op Twitter
- Rapport