Charlie Sheen se derde huwelik vou
2010-11-03 09:02
Los Angeles – Charlie Sheen se derde huwelik is op die rotse.
Sheen het Maandag egskeidingsdokumente by dié stad se hooggeregshof ingedien. Die akteur en Brooke Mueller, ’n eiendomsbelegger, het in 2008 getrou en het 19 maande oue tweelingseuns.
Luidens dokumente wat die webblad TMZ.com in die hande gekry het, hou Sheen onoorkombare verskille voor as die rede vir die egskeiding.
Die paartjie bly al sedert Desember 2009 nie meer saam nie nadat Sheen in hegtenis geneem is in Aspen, Colorado, op aanklag dat hy Mueller met ’n mes gedreig het.
Sheen (45) het in Augustus skuld beken op aanklag dat hy sy vrou aangerand het en is beveel om 30 dae in ’n rehabilitasiesentrum deur te bring.
Verlede week het die polisie op ’n dronk en onsamehangende Sheen in ’n New Yorkse hotel afgekom en hom na ’n hospitaal geneem.
’n Porno-aktrise was glo saam met hom in ’n kamer.
Reuters Life!
- Volksblad