Casper in, uit, in, uit Supersterre
2010-02-28 08:04
Johannesburg - Groot verwarring heers oor die komediant Casper de Vries se toekomstige deelname aan die gewilde SAUK-program Supersterre.
Casper, een van die beoordelaars, het hom onttrek nadat hy die SAUK van ’n geknoeiery beskuldig het.
Die SAUK sê egter die sangeres Patricia Lewis, aanbieder van S uper sterre, het hulle verseker Casper gaan wel aanbly.
Maar Casper self was eergister, toe hy deur Rapport genader is, onseker of hy nog aan die program gaan deelneem.
Die
drama het begin toe Casper verlede Sondag saam met die Egoli-aktrise
Shaleen Surtie-Richards en die sanger Theuns Jordaan die derde episode
van die program opgeneem het.
Die beoordelaars moes een deelnemer die trekpas gee. Hulle het saam besluit dit moet Charnay wees.
Albertus
Kotzé, die programbestuurder, het toe die beoordelaars se stemme na
Patricia en ander rolspelers geneem (dit blyk die drie bekendes is nie
die enigste beoordelaars nie). Maar iewers het ’n fout ingesluip, want
toe word Natasha verkeerdelik aangekondig as die deelnemer wat
uitgestem is.
Sondagaand het Casper op sy twitter geskryf: “En
so, ná drie episodes van Supersterre, bedank ek as judge, want ek kan
nie oneerlike gekonkel met punte goedkeur nie.”
Hy het Patricia glo daardie selfde aand nog van sy bedanking in kennis gestel.
Die volgende dag het Casper met Patricia en haar man, Mark Whitfield, gesels.
Toe
blyk dit dat Theuns, wat aanvanklik gestem het dat Charnay die reeks
moet verlaat, sy stem sonder Casper se medewete verander en Natasha
uitgestem het.
Daarna het Casper op twitter geskryf Natasha keer terug na Super sterre en daarom is hy ook terug.
Teen
dié tyd het die deelnemers en celebrity-afrigters al van sy bedanking
gehoor. Hulle was glo onthuts. Veral Heinz Winckler, Natasha se
afrigter, was baie ontsteld.
Blykbaar het die SAUK ingestem
dat Natasha kan terugkeer, maar dit was die uitvoerende vervaardiger,
Ed Worster, wat ’n stokkie voor die planne gesteek het.
Toe het Casper hom wéér onttrek. Eergister wou hy nie veel sê nie.
“Ek
hou van eerlikheid. Ek kan nie besonderhede verstrek nie, maar daar het
goed gebeur waarmee ek nie gelukkig is nie. Ek kry Patricia baie jammer.
“Ek wil haar en die program nie te na kom nie, maar ek dink sy weet hoekom ek so sterk voel.”
Caroline Phalakatshela, SABC2-woordvoerder, het bevestig dat Casper ongelukkig was.
“Hy
kom wel terug vir latere episodes. Hy gaan nie hierdie Sondag (vandag)
deel wees van die opnames nie omdat hy aan ’n ander program werk.
“As daar ander goed agter die skerms gebeur, weet ons nie daar-van nie.”
Casper wou nie hierop reageer nie.
Supersterre begin op Vrydag 19 Maart om 19:30 ook op SABC2
- Rapport