Casper, casino in bekgeveg oor vloekery

2012-06-10 07:30

Johannesburg – Die bestuur van Emperors Palace in Johannesburg het die komediant Casper de Vries gevra om minder op hul verhoog te vloek nadat teatergangers glo oor De Vries se vertoning VarkinHel gekla het, berig Rapport.

VarkinHel gaan oor die groep Christene wat De Vries verlede jaar op sosiale media gekritiseer het omdat hy volgens hulle godslasterlike uitlatings maak.

Sowat tien mense het volgens die koerant Woensdagaand uit die vertoning gestap omdat De Vries so baie gevloek en godslasterlike woorde gebruik het.

“Ek wil jou nie ontstel of jou styl van komedie verander nie, maar weens die klagtes moet ek jou vra om minder te vloek,” het Andi Shaughnessy, vermaak­bestuurder by die casino, in 'n brief aan De Vries geskryf.

De Vries het aan Shaughnessy gesê advertensies maak dit duidelik dat die vertoning nie geskik is vir sensitiewe gehore nie.

“Ek vind dit vreemd dat mense in ’n casino my show kom kyk, dit beledigend vind en dan gaan dobbel asof hul god oor hulle glimlag,” het hy geskryf.

Volgens die berig weier De Vries om enigiets aan sy repertoirete te verander.

Die kwessie  is intussen uitgestryk.
 
– Lees meer hier

– Volg Nuus24 op Twitter