Buchan: Bly in SA en maak ’n verskil
2011-08-22 08:20
Johannesburg – Die evangelis Angus Buchan sê hy is in Suid-Afrika om te bly.
Al wanneer hy die land sal verlaat, is as God hom sê om dit te doen.
Buchan het Vrydag by die bekendstelling van sy nuwe boek, Jan Alleman (die Engelse titel is Nobodies), aan sy gehoor gevra waarom mense daarvan praat om die land te verlaat.
Hy reis baie en Suid-Afrika is een van die mooiste lande wat daar is.
Dis ’n land vol gewone mense wat God wil gebruik.
Buchan het verwys na Bybelfigure soos Abraham, Dawid en Petrus wat geloofshelde geword het, maar wat eers eenvoudige, gewone mense was.
Hyself was ook net ’n boer met st.8 as hoogste kwalifikasie en tog het God hom gebruik.
Hy het aan sy gehoor gesê enigeen van hulle kan dieselfde doen, want God gebruik gewone mense.
Op ’n vraag waarom hy Zambië vroeër verlaat het as hy mense nou aanraai om in Suid-Afrika te bly, het Buchan gesê destyds het hy nog sy eie kop gevolg.
Hy het nog nie tot bekering gekom nie en gedoen wat hy gedink het goed was.
Nou wag hy op die Here.
Hy het ook verwys daarna dat hy soms in media-onderhoude met moeilike vrae te doen kry.
Dan vra hy die Here leiding en soms is die leiding om niks te sê nie.
Hy het egter ontken dat hy vroeër tydens ’n TV-onderhoud ’n vraag oor pres. Jacob Zuma se verskeie vroue ontduik het.
Buchan het gesê sy antwoord was dat hy aanvaar wat die Bybel oor die huwelik sê.
Toe hy gevra is wat dít is, het hy geantwoord dat hy met een vrou getroud is.
Daarmee het hy sy standpunt gestel.
– Volg Nuus24 op Twitter
- Beeld