Britse ontwerper sê Kate moet minder koop
2013-02-18 18:11
Londen – Die ontwerper Vivienne Westwood het Prins William se vrou, Kate, Sondag aangemoedig om minder uitrustings te koop en meer omgewingsvriendelik te wees in die manier waarop sy aantrek.
Die eksentrieke Britse ontwerper het dié uitlatings gemaak tydens ‘n mediaverklaring voor haar modeparade by die Londense modeweek.
Westwood, ‘n bekende omgewingsaktivis, is deur 'n verslaggewer gevra watter raad sy vir die Hertogin van Cambridge sou gee, omdat sy sedert haar troue 'n styl-ikoon geword het.
“Ek het geen raad om vir haar te gee nie, behalwe dat sy dieselfde klere oor en oor moet dra omdat dit baie goed vir die omgewing sal wees en ook ‘n mooi boodskap sal uitstuur,” het Westwood gesê.
“As jy al daardie moeite gaan doen om ‘n uitrusting te kry wat jou pas, dan moet jy aanhou om dit te dra,” het die 71-jarige bygevoeg.
“Jy hoef nie die een dag ‘n rooi uitrusting te hê en dan die volgende dag iets heeltemal dieselfde in blou nie.”
– Volg Nuus24 op Twitter
- Sapa - AFP
