Britney wou glo $3 milj. meer hê vir X-Factor

2013-01-15 16:26

Los Angeles – Britney Spears het glo daarop aangedring om $3 miljoen (sowat R26 miljoen) meer betaal te word as beoordelaar op The X Factor.

Die Toxic-sangeres het verlede week aangekondig dat sy die program as beoordelaar gaan verlaat na net een seisoen.

Bronne beweer sy het die program verlaat omdat die vervaardigers geweier het om haar salaris-eis van $18 miljoen (sowat R157 miljoen) goed te keur.

“Toe die vervaardigers vir haar gevra het of sy vir ‘n tweede seisoen wil terugkeer het Britney se verteenwoordigers gesê dat sy net sal terugkeer as hulle haar $18 miljoen aanbied,” het ‘n bron vir RadarOnline.com gesê.

“Na baie oorweging het hulle egter besluit dat sy net nie so baie werd is nie omdat sy nie genoeg aan die program bied nie.”

“Hulle het gevoel dat sy nie $3 miljoen meer verdien nie.”

Spears, wat Vrydag aangekondig het dat sy die program gaan verlaat, het gesê dat sy nou weer op haar musiekloopbaan sal fokus.

– Volg Nuus24 op Twitter