Britney aangewys as Forbes se rykste sangeres
2012-12-13 15:53
New York – Die sangeres Britney Spears het Taylor Swift verbygesteek op Forbes se lys van bes betaalde vroulike kunstenaars.
Spears het sowat $58 miljoen (sowat R501 miljoen) uit ondermeer haar album en parfuum oor die afgelope jaar verdien, het die tydskrif Woensdag gesê.
Die 22-jarige Swift was kort op haar hakke met $57 miljoen (sowat R492 miljoen) , danksy haar toer, 'n kontrak met CoverGirl, haar parfuum en haar nuwe album Red.
Die R&B-ster Rihanna het $53 miljoen (sowat R458 miljoen) verdien, wat haar die derde plek besorg het.
Lady Gaga, wat in 2011 die eerste plek beklee het, is nou in die vierde plek met $52 miljoen (sowat R449 miljoen).
Katy Perry, die enigste musikant behalwe Michael Jackson wat vyf nommer een treffers van een album gehad het, het die top vyf afgerond met $45 miljoen (sowat R389 miljoen).
Hier is 'n volledige lys van die top 10:
1. Britney Spears - $58m
2. Taylor Swift - $57m
3. Rihanna - $53m
4. Lady Gaga - $52m
5. Katy Perry - $45m
6. Beyoncé - $40m
7. Adele - $35m
8. Sade - $33m
9. Madonna - $30m
10. Shakira - $20m
– Volg Nuus24 op Twitter
- Reuters
