Brangelina vir R700 000 gedagvaar
2011-11-10 13:37
Los Angeles – Die akteurspaar Brad Pitt en Angelina Jolie se gewese sekretaresse dagvaar hulle vir £55 000 (sowat R700 000).
Ana Charlotiaux (45) het tot Februarie 2010 by die paartjie se woning in Miraval in die suide van Frankryk gewerk en hul telefoon en e-pos navrae hanteer.
Sy beweer egter sy is afgedank omdat sy te veel siekverlof geneem het.
Charlotiaux dagvaar Pitt en Jolie omdat hulle haar na bewering onregmatig afgedank het. Haar prokureur, Emmanuel Ludot, het na afloop van die verhoor gesê sy kliënt soek nie baie geld nie.
“Sy soek net haar regverdige vergoeding omdat sy onregmatig afgedank is.
“Hierdie geld is ‘n druppel in die emmer vir dié sterre. Persoonlik het sy niks teen hulle nie en sy sê hulle het haar altyd baie goed behandel. Hulle het egter niks gedoen om te keer dat sy afgedank word nie.”
Ludot het ook bygevoeg dat sy kliënt oor ‘n tydperk van twee jaar slegs vier en ‘n half maande afgeneem het weens siekte.
Uitspraak in Charlotiaux se saak sal na verwagting volgende jaar in Februarie gelewer word.
– Bang Showbiz.
– Volg Nuus24 op Twitter.