Bono smul aan biltong en bokkoms
2011-02-21 09:13
Kaapstad - Die Ierse rocker Bono het die naweek aan egte tradisionele kos gesmul by ’n spogrestaurant van die Rupert-familie in Franschhoek.
Die bekende Pierneef à La Motte-restaurant was Saterdag die plek vir ’n lekker kuier en middagete vir Bono en ’n gevolg van 17 wat lede van U2 ingesluit het.
Altesaam 72 000 konsertgangers kan steeds nie uitgepraat raak oor die groep se skouspelagtige vertoning Vrydagaand in die Kaapstad-stadion nie.
Die volgende oggend wou hy aan niks anders as tradisionele kos smul nie, het Bono gesê.
Hein Koegelenberg, die man van Hanneli Rupert-Koegelenberg, eienaar van La Motte, het aan Die Burger gesê dit was ’n eer om die gaste te onthaal.
Die tromspeler Larry Mullen jr. het Donderdag op aanbeveling van verhoogpersoneel sowat vyf uur by die restaurante gekuier en hy het besluit om sy vriende daarvan te vertel.
Saterdagoggend het die groep van 18 mense, insluitend Bono en die kitaarslaner The Edge, by die restaurant opgedaag.
“Hulle wou privaatheid hê en ’n lekker middagete geniet. Hulle het nie op ’n wyntoer gegaan nie.
“Hulle het gehoor die restaurant fokus veral op tradisionele geregte,” het Koegelenberg gesê.
Die sjef, Chris Erasmus, het ’n verskeidenheid voorgeregte aan hulle voorgesit voor hulle hul hoofgeregte bestel het. Die voorgeregte het ingesluit pampoen-en-gemmertert, mango-atjar-sorbet, garnaal-en-biltong-slaai, Kaapse bokkomslaai en boerbok-terriengereg.
“As hoofgereg het Bono ’n soutribbetjie bestel wat ons op ’n baie tradisionele manier voorberei. Hy het ’n versnit van viognier en shiraz saam met die dis geniet.”
Koegelenberg het die middag as ontspanne en gesellig beskryf. “Baie foto’s is geneem. Die lede het handtekeninge uitgedeel en selfs op bottels geteken so gemaklik was hulle met almal.”
Volgens Koegelenberg het hulle baie geëerd gevoel dat die rockgroep juis by hulle kom inloer het. “U2 is een van my gunstelinggroepe, so dit was natuurlik ’n hoogtepunt vir my om hulle te kon ontmoet.
“Bono is so ’n goeie ambassadeur vir Suid-Afrika. Hy het (emeritus-aartsbiskop) Desmond Tutu se boodskap van eensgesindheid oorgedra.
Op ’n vraag oor hoeveel die rekening was, het Koegelenberg gesê hulle was gaste en daar was geen rekening nie.
Bono het ook ’n vinnige bloutjie geloop toe hy per ongeluk in die vrouebadkamer beland en in twee meisies vasgeloop het. Daar was ’n gil van opgewondenheid van die meisies se kant af, maar alles is vinnig afgelag.
Volg Nuus24 op Twitter
- Die Burger