Bono sing vir Tutu
2011-10-06 17:03
Kaapstad – Die Ierse musikant Bono het Donderdag vir Emeritus-Aartsbiskop Desmond Tutu gesing vanaf die preekstoel van die St. George’s Katedraal in Kaapstad.
Bono het aan Tutu, wat vandeesweek 80 jaar oud word, gesê hy is “die enigste rockster in die kamer” voordat hy losgetrek het met die liedjie “Still haven’t found what I’m looking for”.
“Daar is slegs een rockster in hierdie kamer wat voor my sit,” het Bono gesê by ‘n bekendstelling van ‘n nuwe boek oor Tutu se lewe.
“Op 80 is jy een punk rock-vlak hoër as ek. Jy is ook gevaarliker as enige rockster omdat, Arch... jy is radikaal soos Christus in wie se spore jy stap.”
Bono het geskerts dat hy slegs in die land is omdat hy “nie radikaal genoeg is om nié ‘n visa te kry nie”.
Tutu het vroeër vandeesweek uitgevaar teen die Suid-Afrikaanse regering oor die manier waarop hulle die visumaansoek van die Dalai Lama, wat Tutu se verjaardagvieringe sou bywoon, hanteer het.
- Volg Nuus24 op Twitter
- SAPA