Bok maak sports by Idols-oudisies
2010-08-08 07:00
Rapport
Bloemfontein - Gareth Cliff ’n bok vir sports? Nie as dit by ’n régte bok kom nie!
Idols-kykers kan Sondagaand sien hoe dié beoordelaar openlik erken hy haat bokke. Dit toe Nicole Heyns à la Heidi-van-die-berge-styl met ’n bok aan ’n leiband by die Bloemfontein-oudisies opgedaag het.
Dié bok maak omtrent amok en kykers kan selfs op televisie sien hoe die dier net oorgee toe die natuur roep. Selfs nie eens ’n kameraman wat probeer keer het dat die bok ’n potplant in plaas van die mat vir sy plassie kies, kon hond haaraf maak nie.
Lede van die produksiespan sê hulle dink sy het probeer jodel, vandaar die bok se teenwoordigheid, maar nie Heyns óf haar vierbeen-vriend het ’n goue kaartjie vir hul deelname gekry nie.
Vanaand kuier die Idols-kameras in Bloemfontein en Port Elizabeth, met Loyiso Bala in Bloemfontein as gasbeoordelaar, terwyl HHP in Port Elizabeth sy eiertjie lê.
Loyiso sukkel maar om die deelnemers op ’n reguit manier te vertel wat hy van hul sang dink, maar HHP hou nie terug nie.
Gareth kon nie as beoordelaar by die Bloemfontein-oudisies optree nie en dis opmerklik hoe Randall Abrahams se persoonlikheid verander en sy sagte kant na vore kom as die blonde platejoggie nié by is nie.
Kan dit wees dat dit Gareth is, en nié die deelnemers nie, wat Randall elke keer so verkeerd opvryf?
’n Man wat vanaand hoor hy moet nié sy skryfloopbaan vir ’n sangloopbaan verruil nie, is die joernalis Lloyd Oldham van die PE Herald.
Oldham erken dat die kollig nie vir hom gemaak is nie en dat hy liefs eerder oor ánder mense in die kollig moet skryf.
Kykers kan ook uitsien na Idols se eie Posh.
S’Posh Petshwa werk tans vir die departement van veiligheid in Port Elizabeth, maar sy sê sy is reg vir ’n nuwe loopbaanrigting.
Om te sien of sy net so goed soos die régte Posh sing, sal kykers maar tot 17:30 moet wag.
Ingrid Engelbrecht van M-Net sê hulle is baie tevrede met die 13 goue kaartjies elk wat in Bloemfontein en Port Elizabeth uitgedeel is.
“Ons was nog nooit daar nie en dis ’n goeie getal as jy dink Durban se oudisies het 20 goue kaartjies opgelewer met baie meer mense.”
Idols-aanhangers hoef nie ’n week te wag vir nuwe kykstof nie.
Dinsdagaand van 19:00 tot 19:30 word die eerste teaterfase-episode op M-Net uitgesaai, met die episode van die tweede teaterfase volgende Sondag.