Boetvaardige Lohan wil kinders inspireer

2013-02-27 11:51

Los Angeles – Lindsay Lohan se prokureur het voorgestel dat sy kliënt dalk eerder motiveringspraatjies moet lewer as deel van haar straf in haar jongste hofsaak.

Mark Heller, Lohan se prokureur, het Dinsdag in ‘n brief aan die hof verskeie alternatiewe vir tronkstraf voorgestel in 'n poging om te probeer verseker dat sy kliënt nie weer agter tralies beland nie.

Lohan kan tronk toe gaan as ‘n regter bevind dat sy die bepalings vir haar voorwaardelike vrylating oortree het. Die aktrise is voorwaardelik vrygelaat ná 'n vorige diefstal-saak teen haar.

Heller het in sy brief aan die hof ook aangevoer dat Lohan se onstuimige private lewe en die omstandighede by haar huis ook ‘n groot rol gespeel het in haar gedrag.

Die aktrise beplan om tyd by skole en hospitale te spandeer, waar sy praatjies sal lewer en kinders sal help om positiewe doelwitte na te streef.

Heller het ook voorgestel dat Lohan ‘n liefdadigheidsorganisasie sal stig ten bate van jong kinders.

Lohan se saak hou verband met 'n ongeluk wat in Junie verlede jaar plaasgevind het. Die polisie het vasgestel dat sy gejok het toe sy aan hulle gesê het sy het nie die Porsche wat in die ongeluk betrokke was, bestuur nie.

Lohan is ondermeer daarvan aangekla dat sy valse inligting aan die polisie verskaf het. Aanklagte van roekelose bestuur is ook teen haar aanhangig gemaak.

Haar verhoor sal op 18 Maart begin.

– Volg Nuus24 op Twitter
 

- Sapa - AP