Strauss-Kahn-skandaal op silwerdoek
2012-08-29 14:25
Parys – Die Franse politikus Dominique Strauss-Kahn is dalk uit die openbare oog, maar sy skouspelagtige ondergang word herhaaldelik in boeke, flieks en TV-programme uitgebeeld.
Die storie van 'n beweerde seksuele voorval van ses minute lank tussen 'n man wat dalk Frankryk se volgende president kon wees en 'n hotelwerker in New York, boei steeds die wêreld – lank nadat die storie uit die koerante verdwyn het.
“Dit fassineer my geweldig. Hy was die baas van die wêreld en ses minute van plesier het oornag sy ondergang beteken,” het die skrywer Stephane Zagdanski oor die voormalige hoof van die Internasionale Monetêre Fonds (IMF), gesê.
Strauss-Kahn se loopbaan het in duie gestort nadat hy in hegtenis geneem is oor die hotelwerker se bewerings van seksuele aanranding.
Die aanklagte is later laat vaar.
Die 63-jarige se ellende het egter nie daar geëindig nie. Toe hy na Europa terugkeer, het erger onthullings oor hom begin kop uitsteek.
Strauss-Kahn is saam met twee sakemanne en ‘n polisiehoof aangekla nadat hy by ‘n onwettige prostitusiekartel betrek is.
Hy het al erken dat hy met baie van die vroue seks gehad het, maar beweer hy het nie geweet dat hulle betaal word nie.
Sy vrou, Anne Sinclair, het hom in Julie om ‘n egskeiding gedagvaar.
En dit is as gevolg van dié elemente wat Strauss-Kahn se storie mense wêreldwyd aangryp.
‘n Amerikaanse speurverhaal wat deur die voorval geïnspireer is, het die New York Times se topverkoper-lys gehaal.
Op TV het die bekende Amerikaanse TV-reeks Law & Order: Special Victims Unit spesiaal na die Strauss-Kahn-saak verwys in een van sy episodes.
Die grootste uitbeelding van die Strauss-Kahn-skandaal is egter nog op pad.
Abel Ferrar, die Amerikaanse regisseur bekend vir die fliek Bad Lieutenant, wil vanjaar nog ‘n fliek maak met Gerard Depardieu wat die rol van Strauss-Kahn sal vertolk.
Strauss-Kahn is grootliks deur sy voormalige vriende en kollegas verstoot en verskyn nie meer veel in die openbaar nie.
– Volg Nuus24 op Twitter
- AFP
