Bobby en sy vrou se baba trek skaal op 3,3 kg
2011-10-25 09:05
Johannesburg – Die sanger Bobby van Jaarsveld en sy vrou, Annatjie, het Maandagmiddag ’n seun ryker geword.
Die knapie, Sion, moes eintlik al vroeg in Oktober sy opwagting gemaak het, het die trotse pa gesê.
“Maar die dokters sê seuntjies is so ’n bietjie lui om gebore te word en Annatjie het gistermiddag om 15:00 ’n keisersnee ondergaan.”
Van Jaarsveld het gesê hulle het lank gebid oor hul seun se naam en het uiteindelik op Sion besluit.
“Dit beteken om jou hoogste roeping te bereik, om so sterk soos ’n berg te staan en beteken ook ‘hemels’. Ek het omtrent elke dag oor hom gedroom en gewonder. Dit verteenwoordig ook die bruid vir Christus.”
Die egpaar het aanvanklik gehoop op ’n natuurlike geboorte vir hul eersteling, wat ’n stewige 3,3 kg weeg.
“Die dokters het verlede week gesê Sion (toe net onder 3,2 kg) raak nou te groot vir Annatjie se lyf en het besluit op ’n keisersnee as hy nie teen Maandagoggend gekom het nie.
“Ons wil so graag sommer baie kinders hê en lyk my ’n keisersnee kan ’n mens se kans op baie kinders verminder.”
Gelukwense van talle ondersteuners en bekendes soos Steve Hofmeyr en Jakkie Louw het Maandag op Facebook en Twitter ingestroom.
- Die Burger