Binnelanders kry 12 nuwe akteurs én nuwe stelle
2009-12-22 07:07
Kaapstad - Die sanger Munro du Toit en ’n sokkerpartytjie in Nagskof lui op Oujaarsaand ’n groot jaar in vir Binnelanders, wat aanstaande jaar op groot skaal gaan uitbrei.
Die volledige produksiespan, skrywers, akteurs en al die stelle van dié gewilde M-Net-sepie het pas na die splinternuwe Stark Films-ateljee in Randburg getrek waar die reeks van 4 Januarie af verfilm gaan word wanneer almal ná die Kersvakansie terugkeer.
Stark Films spog nou met die mees tegnologies gevorderde fliek- en TV-ateljee in Afrika. Baie van Binnelanders se stelle hoef nie meer, soos by gewone sepies, daagliks rondgeskuif te word nie.
Binnelanders se uitsaaityd op M-Net word vanaf April tot ’n uur verleng en daarvoor brei Binnelanders op ’n groot skaal uit.
Twaalf nuwe akteurs sluit hulle in die nuwe jaar by die sepie aan. Hoewel die hospitaaldramas van die Binneland-kliniek steeds sentraal in die sepie se storielyne sal verskyn, het die vervaardigers nou ’n “heel nuwe speelplek’’, het ’n produksielid gister aan Die Burger gesê. Dit sluit splinternuwe, massiewe stelle in wat nie deel van die hospitaal is nie en die bestaande stelle wat opgedollie is.
Nagskof hou volgende Donderdagaand om 18:00 ’n groot partytjie waar die voormalige Idols-deelnemer Munro du Toit sal optree.
- Die Burger
- Die Burger