Big Brother: Bewerings van verkragting ondersoek
2012-01-18 13:00
Rio de Janeiro – Die polisie in Brasilië ondersoek bewerings van seksuele aanranding wat op dié land se Big Brother-realiteitstelevisieprogram uitgesaai is, het 'n woordvoerder van die polisiedepartement Dinsdag gesê.
Insp. Antonio Ricardo L Nunes sê hy het die deelnemers van die program ondervra nadat dit aan die lig gekom het dat Daniel Echaniz, 'n deelnemer, weens sy ontoelaatbare gedrag gediskwalifiseer is.
Nunes wou nie verdere besonderhede bekendmaak nie.
Echaniz, 'n 31-jarige manlike model, is die trekpas gegee nadat bewerings aan die lig gekom het dat hy seksueel verkeer het met die deelnemer Monique Amin nadat sy aan die slaap geraak het.
Die voorval het glo plaasgevind nadat daar 'n partytjie gehou is waar die drank vrylik gevloei het.
Pedro Bial, aanbieder van Big Brother in Brasilië het gesê hulle het die beeldmateriaal van die program nagegaan en gesien dat Echaniz die reëls van die program verbreek het en sy gedrag onaanvaarbaar was.
Echaniz se diskwalifikasie het ook gerugte van rassisme laat ontstaan omdat hy 'n gemengde ras is en Amin wit.
Alhoewel deelnemers al in die verlede van Big Brother produksies in ander lande afgeskop is weens seksuele gedrag, is dit die eerste diskwalifikasie op die Brasiliaanse program wat tans in sy 12de jaar is.
– Volg Nuus24 op Twitter.
- SAPA