Beseerde Lady Gaga stel vertonings uit

2013-02-13 09:26

New York – Lady Gaga het haar teleurstelling uitgespreek ná sy vier vertonings moes uitstel omdat sy weens ‘n besering nie behoorlik kan loop nie.

Die omstrede kunstenaar se vertonings op 13 en 14 Februarie in Chicago, op 16 Februarie in Detroit en op 17 Februarie in Hamilton, Kanada, is almal volgens 'n verklaring wat Dinsdag uitgereik is, uitgestel.

Gaga het op Twitter verduidelik dat sy haar tydens ‘n vorige vertoning beseer het en dat haar toestand sedertdien vererger het. Sy het bygevoeg dat sy die besering van haar personeel probeer wegsteek het, maar dat sy op die oomblik nie eens kan loop nie.

“Ek steek al ‘n tyd lank ‘n besering weg en oor die laaste maand het dit net vererger,” het Gaga getwiet.

“Ek het gebid dat dit gesond word.”

Die mediaverklaring het nie verduidelik presies wat die besering is wat Gaga opgedoen het nie.

– Volg Nuus24 op Twitter
 

- Sapa - AP