Bekendes se partytjieplanne
2010-12-31 07:40
Die Burger
Kaapstad. – Emo Adams het aanvanklik ’n “rustige” aandjie vir vanaand beplan. Net agt mense. Maar toe word die lysie net langer en die planne net groter.
Die Burger het ’n paar bekendes gister gevra waar hulle die sjampanjeproppe vannag om middernag gaan skiet.
Adams het gesê hy gaan “alles- behalwe rustig wees”.
“In plaas daarvan om uit te gaan, gaan ons ’n jol by die huis hou. ’n Mal pool-party. Dit het begin as ’n stil aandete vir net agt mense, nou staan die party al op 30 mense! En dit gaan nié rustig wees nie!” het hy gespot.
Die TV-aanbieder Liezel van der Westhuizen gaan saam met haar familie in Port Alfred in die Oos-Kaap kuier.
“Ons het ’n groot gedoente met die familie dié jaar. Gewoonlik werk ek oor Nuwejaar, maar dié jaar is die eerste keer dat ek weer kan af wees en ek sien só uit daarna. Ons gaan lekker kampeer en op die strand baljaar,” het sy gesê.
Die rap-kunstenaar Jack Parow tree vanaand in Durban op. “Ek gaan lekker party en jol,” het hy gesê.
Die sanger Bok van Blerk is in Mosambiek, waar hy vanaand gaan optree en 2011 op ’n hoë noot sal binnegaan.
Volg Nuus24 op Twitter.
- Die Burger