Bass wen prys vir fliek-idee
2010-07-29 08:50
Durban - Die Kaapstadse rolprentmaker Jenna Cato Bass is die wenner van die Nederlandse Hubert Bals-rolprentprys wat op die eerste Durban FilmMart uitgeloof is. Haar voorgestelde rolprentprojek Tok Tokkie is aangewys as die “belowendste Afrika-projek wat op die filmmark voorgelê is”.
Bass ontvang sowat R45000 om haar projek verder te ontwikkel. “Al was die jurie se besluit eenparig, was dit ’n moeilike keuse omdat al 12 projekte groot belofte toon,” het die beoordelaars luidens ’n persverklaring gesê.
Prente van Ethiopië, Burkina Faso, Egipte, Nigerië en Suid-Afrika is voorgelê in die fiksie- en dokumentêr-genre.
Rolprentmakers soos Madoda Ncayiyana, Idrissa Oeudraogo, Francois Verster en Jessie Chisi was onder diegene wat voorleggings gedoen het.
Tok Tokkie word voorts as “’n vars, innoverende en oorspronklike projek bestempel en het groot kommersiële waarde, wat by Suid-Afrikaanse, Afrika- en internasionale gehore byval sou vind.”
Bass se Tok Tokkie, verwys na die kinderspeletjie waar kinders aan ’n deur klop en dan weghardloop.
“Die speletjie is ’n mengsel van vrees en nuuskierigheid. Ons hardloop weg van dit waarvoor ons bang is, tog loer ons steeds om die hoek om te sien watter duiwels of engele die deur gaan oopmaak,” skryf Bass in haar voorlegging.
Haar prent speel in Kaapstad in die nabye toekoms af en handel oor Chi en Fridge, twee inspekteurs wat vir die Black Cross werk.
Dié organisasie sien om na die belange van spoke. Dit is nie ’n maklike taak nie, aangesien die regering weier om te erken dat spoke bestaan. Hulle moet ook nog die Freak-polisie beveg, wat poog om spoke te vang en as slawe te verkoop. Hul vennoot is Louis, ’n honderdjarige geesdokter wat in die liggaam van ’n 15-jarige seun nesgeskop het.
Die 23-jarige Bass het aan die rolprentskool Afda in Kaapstad afgestudeer. Sy het ervaring as ’n musiekvideo-regisseur, kinematograaf, skrywer, fotograaf en towenaar. Haar rolprente sluit in die wetenskapsfiksie-prent So Long to the City; die eksperimentele Jellyfish, ’n tienerdrama, Already Gone; en en ’n historiese drama, The Tunnel.
Die prys is vir Bass ’n groot eer. “Dit is wonderlik dat hulle die meriete van my mal prent ingesien het. Benewens die geld, beteken die erkenning dat die keurders in my werk glo.”
Sy het die filmmark as onontbeerlik vir ’n jong rolprentmaker beskryf. “Ek het in die verlede al sulke markte bygewoon. Dié een rus jou toe met werklik praktiese inligting om jou projekte te ontwikkel. Boonop bou jy hier ’n kontaklys op en kry jy die geleentheid om ’n indruk te maak.”
Met die prys en die kontakte glo Bass dat “Tok Tokkie beslis ’n werklikheid gaan word”.
Die beoordelaars vir die Hubert Bals-prys was Matthew Plouffe van Amerika se Focus Features, Peace Anyiam-Osigwe van die Afrika-rolprentakademie in Nigerië en Iwana Chronis van die Hubert Bals-rolprentfonds van Nederland.
Die Durbanse FilmMart is die grootste en een van slegs twee ko-produksiemarkte in Afrika. Altesame 185 afgevaardigdes van 16 lande het dit bygewoon. Dit word tesame met ’n internasionale rolprentfees aangebied wat Sondag eindig.
- Die Burger