Bang Bang Club tref Toronto Filmfees
2010-07-29 15:00
Kaapstad - The Bang Bang Club, waarin onse Eisj-man, Neels van Jaarsveld, een van die hoofrolle vertolk, gaan 'n spesiale gala-vertoning kry by die 35ste jaarlikse Toronto Internasionale Filmfees.
Die fees het Woensdag die spesiale vertonings aangekondig. The Bang Bang Club het een van 15 gesogte vertonings gekry.
Die fliek is verlede jaar in Suid-Afrika verfilm en spog met plaaslike talente soos Frank Rautenbach (as die fotograaf Ken Oosterbroek) en Neels van Jaarsveld (as Joao Silva). Hul medesterre sluit in Ryan Phillippe, Malin Akerman & Taylor Kitsch.
The Bang Bang Club is gegrond op die gelyknamige boek wat handel oor vier jong fotograwe, Greg Marinovich, Kevin Carter, Ken Oosterbroek en Joao Silva, wie se foto's die finale bloedige dae van Apartheid in Suid-Afrika vasgevang het.
Die Toronto Internasionale Filmfees vind plaas vanaf 9 tot 19 September en sluit rolprente in soos Ben Affleck se The Town.
Na verwagting sal The Bang Bang Club eers volgende jaar in Suid-Afrikaanse teaters draai.