Bafunny Bafunny speel voor in die lagkoor
2010-05-13 10:25
Chantelle Nicholas
Kaapstad - Wat het agt van ons land se voorste komediante met sokker in gemeen? Absoluut niks!
Maar as komedie ‘n sport was, wie sou Suid-Afrika die beste by die Wêreldbeker-sokkertoernooi verteenwoordig?
Volgens Hunta Live, bekend vir komediefeeste, sou hierdie agt komediante die knoop deurhaak:
Afrigter: Mark Banks, ook bekend as Markos Santanos Bankos.
Spelers:
Barry “The Cousin” Hilton (kaptein);
Trevor “Delicious” Noah;
Nik “Bokkie” Rabinowitz;
Loyiso “Laduuuma” Gola;
Marc “Long Shot” Lottering;
Kagiso “Kaka” Ladiga;
en John “Die Voël” Vlismas.
“Ons kom almal famously oor die weg, soos deelnemers aan ‘n Miss Universe-kompetisie," het Long Shot die span se dinamika aan Nuus24 verduidelik.
“Elke komediant het aan sy eie roetine gewerk, in sy eie tyd en in die privaatheid van sy eie seiljag!”
Die agt grapmanne het in April ‘n oefenkamp by Hartbeespoortdam bygewoon en, soos Bokkie dit stel, was "Kamp Draadtrek" ‘n moeilike maar leersame ondervinding.
Bokkie het ook heelwat oor sy karakter te sê gehad.
“Ek verstaan waarom Hunta Live my Bokkie in plaas van Hoender noem. “Bokke kan baie dinge doen, terwyl hoenders vlerke het maar nie eens kan vlieg nie, nes Nationwide.”
Bafunny Bafunny sal op Vrydag 28 Mei en Saterdag 29 Mei in Kaapstad by GrandWest te sien wees, Woensdag 2 Junie in Johannesburg by die Internasionale Konferensiesentrum, en op 3, 4 en 5 Junie by Carnival City.
Kaartjies wissel tussen R120 en R200 en geen kinders onder 16-jarige ouderdom word toegelaat nie.
Vir meer inligting, besoek www.bafunnybafunny.com
Volg Nuus24 op Twitter.