Babavreugde vir prins William, Catherine

2012-12-04 07:02

Londen – Catherine, die hertogin van Cambridge sal nog dae lank in 'n hospitaal in Londen behandel word vir oggendsiekte, het paleisbeamptes gesê.

Die St.James-paleis het Maandag bekend gemaak dat die hertogin en haar man, prins William hul eersteling verwag en gesê Catherine ervaar Hyperemesis gravidarum (erge oggendnaarheid).

Luidens 'n verklaring sal sy ook 'n ruk lank moet rus.

Die paleis wou nie sê hoe ver die 30-jarige hertogin se swangerskap is nie, en het slegs gesê sy is nog nie 12 weke swanger nie.

Die baba sal die derde aanspraakmaker op die troon wees, dus sal prins Harry nou in die vierde plek in dié lyn afskuif.

Ongeag of die kleinding ’n ­seun of meisie is, sal hy of sy die Britse troon kan bestyg nadat wetgewing oor die opvolging ge­wysig is, berig Die Burger.

Die Amerikaanse president, Barack Obama, het die paartjie geluk gewens met die nuus dat hul eersteling op pad is.

Die Obamas het die koninklike paartjie verlede jaar tydens 'n staatsbesoek aan Brittanje ontmoet.

– Volg Nuus24 op Twitter

- Sapa - AP