Baartman voor stok, maar hy is houtgerus
2011-03-25 08:01
Kaapstad - ’n Hewige stryd woed nou tussen die uitvoerende hoof van Radio Houtstok, Louis Baartman, en Wimpie van der Sandt, die voormalige stasiebestuurder.
Daar is ook ’n groot moontlikheid dat Baartman dalk sy tasse moet pak en afskeid van die stasie moet neem. Hy het vir ’n tweede keer nie by ’n vergadering van die uitvoerende bestuur van Radio Houtstok opgedaag nie.
Donderdag het dié bestuur ’n vergadering gehou waarop hulle sou besluit oor die toekoms van Baartman en die radiostasie.
Baartman het egter ’n SMS gestuur om te sê hy kan nie die vergadering bywoon nie. Volgens die SMS soek hy nog dokumente.
Henk van Aswegen, uitvoerende hoof van Radio Houtstok (’n artikel 21-maatskappy), het gesê dis die tweede keer dat Baartman nie by ’n bestuursvergadering opdaag nie.
“Ons het die vergaderings belê om te besluit wat met die radiostasie vorentoe gaan gebeur. Louis moes ook tydens dié vergaderings sy kant van die saak stel.
“Die bestuur gaan môre (vandag) weer vergader. As hy dan nie opdaag nie, sal ons sonder hom besluite moet neem,” het hy gesê.
Van Aswegen het gesê die bestuur moet ’n besluit neem vir die gemeenskap en die mense wat Radio Houtstok ondersteun.
Intussen gaan die geveg tussen Baartman en Van der Sandt voort.
Laasgenoemde en die ander omroepers het Maandag die stasie verlaat nadat net twee van hulle deur Baartman betaal is. Die ander is deels betaal.
Baartman het Donderdag gesê hy gaan ’n klag van diefstal indien omdat Van der Sandt CD’s en ’n databasis van hom het.
Van der Sandt het gesê Baartman kan sy goed “met liefde terugkry”, mits hy sy salaris betaal.
“Buitendien, die databasis is my intellektuele eiendom,” het Van der Sandt gesê.
- Die Burger