Avatar 2 ’n moontlikheid
2010-02-05 11:38
Los Angeles – Die regisseur James Cameron het gesê hy kan dalk “oorreed” word om ‘n opvolg vir sy lokettreffer Avatar te maak.
Dié futuristiese 3-D fliek het Dinsdag weer ‘n mylpaal bereik toe dit as die hoogste winsgewende rolprent van alle tye aangewys is.
“Ek mag dalk oorreed word. Ons sal eers moet sien hoeveel dit gaan verdien,” het Cameron aan CNN gesê toe hy uitgevra is oor ‘n moontlike opvolg.
In die onderhoud het Cameron gesê hy was verras deur Avatar se sukses by rolprentteaters.
“Dit is nie een of ander vorm van valse nederigheid nie, maar ons het gedink dit sou ‘n kommersiële rolprent gewees het en dat dit sowat die helfte van die geld sou maak as wat dit reeds verdien het,” het hy gesê.
- AFP