Atletiekpaartjie haak in Bfn af
2011-12-19 10:01
George. – LJ van Zyl (26), Suid-Afrika se hekkiesblits, en sy verloofde, Irvette van Blerk (24), gaan in September aanstaande jaar in Bloemfontein trou, kort ná die Olimpiese Spele in Londen.
Van Blerk, ook ’n bekende atleet, het Sondagmiddag in die Suid-Kaap aangekom waar Van Zyl aan ’n oefenkamp deelneem. Hulle het verlede week in Pretoria verloof geraak.
Van Zyl het aan Volksblad gesê hulle gaan in Bloemfontein trou. Dit is daar waar hulle mekaar die eerste keer in 2004 raakgesien het op die SA junior atletiekbyeenkoms. Hy het Van Blerk Sondagmiddag op die George-lughawe met ’n bos rose en ’n speelgoed-cheetah ingewag.
Hulle het net oë vir mekaar gehad, nadat hulle die eerste week van hul verlowing nie bymekaar kon wees nie.
Van Blerk het vertel hoe hulle ontmoet het. Sy het in 2008 op die junior byeenkoms opgewarm vir ’n nommer. Van Zyl het verbygestap. “Ek het gedink hy is nogal oulik.”
In een stadium het sy gesien dat Van Zyl omkyk en haar dophou. Die aand het hulle ’n kuierplek besoek. Sy was eintlik nog te jonk om toegelaat te word en sy het haar ma se hoëhakskoene geleen om ouer te lyk.
Albei sal waarskynlik aanstaande jaar aan die Olimpiese Spele deelneem: Van Zyl aan die 400m-hekkies en Van Blerk aan die marathon. Sy het nog tot April tyd om te kwalifiseer.
Van Blerk het gesê die troureëlings gaan vinnig afgehandel word sodat dit nie inmeng met hul oefenprogramme nie. Oor die verlowing het sy gesê dit was ’n verrassing. “Ek was half vies die Saterdag, want ek wou gaan vir middagete. Hy was ontwykend.” Sy het toe maar 8km gaan draf. Terug by Van Zyl se huis het die verrassing gewag. “Ek was nie seker of hy ’n grap maak nie. Die eerste ding waaraan ek gedink het, was dat ek my identiteitsboekie en bankkaarte sal moet verander.”
Van Zyl het gesê sy voorkeure sal nie verander nie. Vir die volgende vyf jaar bly dit atletiek. Die verlowing gaan hom help en hy sal meer gefokus kan wees. “Ek hou duime vas dat Irvette kwalifiseer. Dit sal die Olimpiese Spele meer spesiaal maak.”
Volg Nuus24 op Twitter.