Ashton, Demi baklei oor geld

2012-10-22 10:29

Los Angeles – Ashton Kutcher en Demi Moore sukkel glo om 'n skikkingsooreenkoms te bereik in hulle skeisaak omdat hulle nie ooreen kan kom oor die bedrag wat Kutcher veronderstel is om te betaal nie.

Die voormalige paartjie kan glo nie besluit hoe om hulle enorme fortuin te verdeel nie.

Hulle is verlede November uitmekaar ná Kutcher 'n buite-egtelike verhouding met die 22-jarige Sara Leal gehad het.

Moore en Kutcher was ses jaar getroud.

“Hulle probeer ‘n ooreenkoms buite die hof beding en probeer die egskeiding so veel as moontlik uit die publieke oog hou. Hulle het nog nie ‘n ooreenkoms oor geld bereik nie omdat Ashton aansienlik meer verdien het in die laaste jare van hulle huwelik. Hy wil egter nie ‘n groot bedrag aan Demi betaal nie,” het ‘n bron aan The New York Post gesê.

Die 34-jarige Kutcher is tans die hoogsbetaalde TV-ster danksy sy rol in Two and a Half Men. Kutcher is sowat R1,2 miljard werd en Moore het ongeveer R1,3 miljard in die bank.

“As hulle nie gou ‘n ooreenkoms bereik nie kan dit in ‘n lelike hofsaak ontaard,” het nog ‘n bron gesê.

Ashton bly glo op die oomblik saam met sy nuwe meisie, die aktrise Mila Kunis, wat hy al 14 jaar ken sedert hulle saam aan That 70s Show gewerk het.

– Volg Nuus24 op Twitter