Arno hoor eers later oor dronkry

2011-11-09 08:04

Leighton Koopman

Kaapstad – Die dronkbestuurverhoor van die sanger en liedjieskrywer Arno Carstens is Dinsdag weer in die landdroshof in Kaapstad uitgestel.

Die sanger, wat Dinsdag laat vir sy saak opgedaag het, sal nou tot Januarie volgende jaar moet wag om te hoor of die staat hom gaan vervolg.

Carstens is op 20 Desember verlede jaar op ’n klag van bestuur onder die invloed van drank in hegtenis geneem.

Hy het in Mei vanjaar vir die eerste keer in die hof verskyn en is op borgtog van R500 vrygelaat.

Die saak is toe tot Dinsdag uitgestel om te besluit of hy vervolg gaan word.

Milton de la Harpe, sy regsverteenwoordiger, het in Mei vertoë tot die kantoor van die nasionale direkteur van openbare vervolging (DOV) gerig om oor die saak te besluit.

De la Harpe het Dinsdag aan die hof gesê hy het nog geen terugvoering van die DOV gekry nie.

Dit het toe in die hof uitgekom dat die DOV nooit die dossier ontvang het nie.

Carstens, wat van Johannesburg af vlieg om die hofsaak in Kaapstad by te woon, sal op 27 Januarie volgende jaar weer verskyn.

– Volg Nuus24 op Twitter

- Die Burger