Angelina Jolie hof toe gesleep oor kopiereg
2011-12-06 11:02
Los Angeles – Angelina Jolie word gedagvaar deur 'n joernalis van Kroasië wat beweer die aktrise se film In the Land of Blood and Honey is op sy boek gebaseer.
James Braddock beweer die Oscar-bekroonde aktrise se nuwe film, waarin sy haar debuut as regisseur maak, is op sy boek The Subject Work gebaseer.
Luidens hofdokumente beweer Braddock hy en die regisseur Edin Sarkic, wat nou saam met Jolie aan haar nuwe film werk, het mekaar verskeie kere in 2008 ontmoet om oor die moontlikheid te gesels om sy boek in 'n film te verwerk, berig X17.
Volgens Braddock het hulle oor die inhoud van sy boek gesels, wat ooreenkomste met die film In the Land of Blood and Honey toon en ook die liefdesverhaal tussen 'n vroulike gevangene en 'n soldaat van Serwië uitbeeld.
'n Regter moet nou bepaal of die ooreenkomste tussen die boek en die film wel die kopieregwet oortree.
Braddock het intussen versoek dat die rolprent se bekendstelling op 23 Desember uitgestel moet word en hy soek ook 'n onbekende bedrag geld vir skadevergoeding.
Dit is die jongste regsgeding vir Jolie nadat sy en haar lewensmaat, Brad Pitt, ook deur Ana Charlotiaux, hul voormalige sekretaresse, gedagvaar is omdat hulle haar na bewering onregmatig afgedank het.
Charlotiaux (45) het tot Februarie 2010 by die paartjie se woning in Miraval in die suide van Frankryk gewerk en hul telefoon en e-pos-navrae hanteer.
Haar prokureur, Emmanuel Ludot, het vroeër gesê sy kliënt vra net vergoeding vir haar onregmatige afdanking.
– Bang Showbiz.
– Volg Nuus24 op Twitter.