Amor wil insae in Joost se geldsake hê
2011-05-29 08:00
Johannesburg - Joost van der Westhuizen beskuldig sy vervreemde vrou, Amor Vittone, daarvan dat sy baie meer belang stel in die stand van sy finansies as wat sy omgee oor sy gesondheid.
“En as sy net haar foon wil antwoord wanneer ek haar bel, sal ek alles verduidelik. Maar sy antwoord nie. Sy gee nie om nie.”
Sy woede en teleurstelling kom nadat Amor aan Huisgenoot gesê het sy glo nie die storie dat Joost ’n dodelike siekte het nie.
Amor is van dié mening omdat Joost se oggend- en aandpraatjies volgens haar nie ooreenstem nie.
Die ernstige en ongeneeslike spiertoestand motorneuronsiekte (MNS) is voorlopig by die oud-Bok gediagnoseer.
Oor die Huisgenoot-onderhoud het Amor aan Rapport gesê: “Ek het bloot vrae beantwoord wat aan my gevra is. Ek is verward.
“Wat moet ek glo? Het hy nou die siekte of nie? Wat beteken ‘voorlopig’? Ek wil net hê hy moet openlik wees.”
Amor sê sy word gekruisig (met verwysing na kommentaar op Huisgenoot se webwerf) – en dít net omdat sy bekommerd is.
“Ek wil nie in ’n moddergooiery met die pa van my kinders betrokke raak nie. Ek wens hom nie hierdie dodelike siekte toe nie. Maar hoekom eers media toe gaan?”
Joost sê egter hy was nog altyd eerlik met Amor. “Ek is in die Sunninghill-hospitaal opgeneem en twee ure later toe weet die media ek is daar. Iemand moes hulle vertel het.
“Ek het slegs met Rapport gepraat om spekulasie rondom my gesondheid stop te sit.”
Joost het verlede week eksklusief en die eerste keer met Rapport gepraat oor sy MNS-diagnose op 3 Mei. Hy was erg bekommerd oor sy twee kinders as hy iets moes oorkom.
“Dit maak my so hartseer om te sien hoe ons persoonlike sake in die media bespreek word,” sê Joost.
Dr. Jody Pearl, Joost se neuroloog, meen die oud-Bok-kaptein se MNS-vermoede is gebaseer op inligting wat aan hom gegee is.
“Hy probeer nie simpatie kry van enigiemand nie. Mý toetse sal oor drie weke voltooi wees.”
Amor sê sy het telefonies met Pearl gepraat en die dokter het gesê sy (Amor) moet self besluit of sy haar kinders in Joost se sorg wil laat.
Toe Rapport Pearl hieroor vra, het sy gesê gesprekke tussen haar en familielede van pasiënte is vertroulik.
Gavin Varejes, direkteur van South African Point of Purchase, het bevestig Joost is werksaam by hom.
“Ons hanteer handelsmerke vir ’n paar Vodacom-winkels. Joost is fenomenaal om mense te oortuig om ons besigheid te ondersteun, maar ons moes sy pligte verander weens die siekte.”
Joost is tans met siekteverlof.
***
Sy gesondheid is nie die enigste ding waaroor Joost van der Westhuizen bekommerd is nie. Die egskeidingsaak tussen hom en sy vervreemde vrou, Amor Vittone, gaan steeds voort.
En agter die skerms is hul prokureurs aan die toutrek oor hoe die egpaar se bates verdeel moet word.
Joost het Saterdag gesê: “Ek gaan nie my huwelik in die openbaar bespreek nie. Waarvan ek seker is, is dat ons albei skuldig is aan die verbrokkeling daarvan.” Hy wou nie uitwei oor waaraan Amor skuldig sou wees nie.
Robert Klinkenberg, Joost se prokureur, sê die wyse waarop Amor in die media praat oor hul persoonlike sake is onaanvaarbaar.
Joost sê Amor is al ses maande in besit van ’n skikkingsooreenkoms wat sy nie wil aanvaar nie.
Claudio Bollo, Amor se regsverteenwoordiger, sê: “Ons soek ordentlike finansiële state van Joost se uitgawes, inkomstes en bates. Sy vrou is geregtig op sulke inligting. Amor wil skei, maar hoe verdeel ’n mens bates as ons nie weet wat hy alles het nie?”
- Rapport