Amor vra Joost glo om te loop
2010-05-20 06:00
Kaapstad - Die oud-Springbokkaptein Joost van der Westhuizen het glo uit sy en die sangeres Amor Vittone se huis in Dainfern Valley in Johannesburg getrek.
Hy het Donderdag reeds by ’n sakekennis, mnr. Garry Hartslief, ingetrek, het ’n bron wat sowel die Van der Westhuizens as vir Hartslief ken gisteraand gesê.
Hy het op voorwaarde van anonimiteit gepraat “omdat ek nie verhoudinge wil versuur nie. Ek kan jou waarborg dat my inligting heeltemal korrek is”.
Nóg Van der Westhuizen nóg Hartslief het gisteraand by navraag die bewerings erken of ontken.
Van der Westhuizen het gesê: “Wat in my huis gebeur is my private sake. Ek gaan dus nie kommentaar lewer nie, soos ek verlede jaar al ná die video-debakel gesê het.”
Die video-debakel waarna hy verwys, is die sogenaamde Joost-seksvideo waarin hy en ’n ontkleedanseres half kaal is. Van der Westhuizen verskyn op die video, waar dit lyk of hy dwelms snuif.
Hy het die bewerings aanvanklik ontken, maar het dit later alles erken.
Hartslief, ’n sakeman wat veral in sportkringe bekend is, het gesê sowel Amor as Joost is vriende van hom en dat hy dus nie kommentaar wil lewer nie.
“Ek erken nie die inligting wat Die Burger het nie, maar ek ontken dit ook nie. Wat ek wel kan sê, is dat die feite soos dit nou aan my gestel is nie 100% korrek is nie. Ek is self onlangs deur ’n moeilike egskeiding en ek weet hoe gerugte kan loop.”
Volgens Die Burger se bron is die skeiding van tafel en bed tussen die egpaar op Amor se versoek, “omdat sy duidelikheid in haar gemoed wil hê oor die pad vorentoe vir haar en Joost. Niemand sê daar is besliste sprake van ’n egskeiding nie”.
Amor het nie gereageer op ’n versoek op haar selfoon om kommentaar nie.
- Die Burger