Amor sê sy is steeds lief vir Joost
2010-08-25 07:10
Kaapstad – In haar eerste TV-onderhoud vanaand ná die onlangse verbrokkeling van haar huwelik met Joost van der Westhuizen gaan Amor Vittone openlik praat oor sy ontrouheid, die seksvideo en die geheime wat die glanspaartjie se huwelik gekelder het.
Die twee is midde-in ’n smerige egskeidingsgeding gewikkel, maar vanaand sal kykers ’n ander Vittone sien wanneer sy reguit oor haar huweliksprobleme gesels – ’n sterker, reguit en baie meer selfversekerde vrou as toe die trane presies ’n jaar gelede met haar Kwêla-onderhoud op kykNET vlak gelê het.
Sy gesels vanaand om 20:00 in die kletsprogram No Reservations op SABC3 met Basetsana Kumalo en Michelle Garforth-Venter.
Die onderhoud is verlede week opgeneem met Loui Fish, eksvrou van die sokkerspeler Mark Fish, as nog ’n glansvrou wat oor sy ontrouheid gesels.
In ’n uittreksel van die onderhoud wat Die Burger gesien het, sê Vittone hulle is voor die onthulling van Van der Westhuizen se seksvideo “afgepers vir geld, want hulle het gesê ‘ons gaan julle kinders wegvat’. So, ons is afgepers vir twee en ’n half jaar. Dit was natuurlik weens die video en ek het niks daarvan geweet nie.
“Ek het by hom gestaan. Ek glo dat mense altyd tweede kanse verdien, want ons is nie perfek nie. Ek kan nie hier staan en sê ‘Ek is so fantasties en jy het dit en dat gedoen nie...’”
Vittone sê sy het grense gestel nadat hulle besluit het om weer aan hul huwelik te werk. “Oukei. Van nou af doen ons nie meer dit nie. En wanneer dit weer gebreek word...dan kom jy op ’n punt waar jy net sê: ‘Dis dit’.’’
Oor Van der Westhuizen sê sy: “Ek is steeds lief vir hom. Hy is die pa van my kinders en ons het goeie tye saam gehad.”
Intussen is Van der Westhuizen en Vittone se prokureurs druk besig om ’n skikkingsooreenkoms vir die finalisering van hul skeisaak te onderhandel, berig Gloria Edwards
- Volksblad