Amor nou leerlingomroeper
2010-01-23 08:31
Sanri van Wyk
Johannesburg – Sy het eers bekend geword as TV se Lotto-meisie, toe vir haar stem, danspassies en omstrede huwelik met Joost van der Westhuizen.
Nou het die sangeres Amor Vittone ’n radioloopbaan as een van Jacaranda 94.2 se leerlingomroepers begin.
Altus Venables, publisiteitskoördineerder van Jacaranda 94.2, het gister gesê die sangeres is ná ’n “moeilike” en “uitdagende” jaar (verlede jaar) in die stasie se opleidingsprogram opgeneem.
Lloyd Madurai, die stasie se hoof van talent, inhoud en programme, sê: “Sy bly nederig en begin as ’n leerlingomroeper op ons laataandprogram, om te wys dat sy het wat dit vat om suksesvol te wees.”
Vittone het verlede jaar oor dié stasie haar stilswye van sowat agt maande oor die sage-rondom haar man se seksvideo verbreek nadat dié erken het dit was hy in die video.
Vittone kon nie vir kommentaar bereik word nie.
- Volksblad