Amor die joos in oor bewerings dat sy mense opsweep
2011-07-12 09:08
Johannesburg - Publisiteit oor haar vervreemde man, Joost van der Westhuizen, het haar haar werk as omroeper by Jacaranda 94.2 gekos – maar sy het mense “nooit, ooit” aangemoedig om druk daaroor op die radiostasie te plaas nie.
So het Amor Vittone Maandag gesê oor bewerings op sosiale netwerke dat sy mense opsweep om druk op Jacaranda 94.2 te plaas om haar weer in diens te neem.
Die stasie het ’n maand gelede aangekondig Vittone se kontrak as gasaanbieder word nie ná 3 Julie hernu nie.
“Daarna het ek talle navrae op Twitter gekry van my aanhangers wat wou weet waarom ek weg is ... Ek het getwiet dat die bestuur van Jacaranda 94.2 inderdaad nie my kontrak wou hernu nie weens die negatiewe publisiteit rondom Joost. Dit is die reine waarheid. Wat anders moes ek sê? Moes ek lieg?
“Toe het iemand veral op Facebook die gerug versprei dat ek my aanhangers opsweep om druk op Jacaranda 94.2 te plaas om my terug te vat. Dit is belaglik en hoegenaamd nie die waarheid nie. Natuurlik was ek ’n bietjie sad toe Jacaranda nie my kontrak wou hernu nie, maar the show must go on. Ek het dit so aanvaar.”
Jenny Griesel, kommunikasiehoof van Jacaranda 94.2, het Maandagaand gesê die publisiteit rondom Van der Westhuizen het geen rol in die besluit gespeel nie. “Dit was bloot ’n besluit wat gegrond is op normale verandering van programskedules en aanbieders. In ieder geval kan ons die moontlikheid nie uitsluit dat Amor in die toekoms dalk weer gevra sal word om ’n program aan te bied nie, want sy is baie talentvol.”
Griesel het gesê sy weet van geen druk oor die kontrak wat op die stasie toegepas word nie.
- Beeld