Amor: 'Joost het media voortydig vertel'
2011-05-27 09:56
Kaapstad - Sy moes vir haar kinders vertel hul pa is besig om dood te gaan – voor hulle dit dalk by maatjies by die skool hoor – want dit is wat Joost van der Westhuizen haar vertel het.
Maar ’n week later lees sy in die koerant die doodsvonnis wat sy toe aan die kinders oorgedra het, is dalk nie akkuraat nie...
Dít is die dilemma waarmee Amor Vittone in die dae ná die onthulling oor haar eksman se gesondheidskrisis gesit het. Dis ook die rede waarom sy besluit het om openlik met Huisgenoot te praat oor die dag toe sy moes hoor hy ly aan ’n dodelike motorneuronsiekte (MNS).
Al rede waarom sy haar swye verbreek, sê sy, is om ’n einde te maak aan al die vrae wat aan haar gestel word.
“Ek is in die donker en dit maak my mal. Ek moes vir Jordan (7) vertel sy pa gaan doodgaan, want ek was bang hy hoor dit by maatjies by die skool. Ek het vir hom en Kylie (5) vertel hoe die engeltjies siek mense kom haal en hulle gaan vir pappa ook kom haal.
“Nou vra ek jou: As hulle nie so seker was oor die eerste diagnose nie, hoekom moes ek dit dan vir ons kinders vertel? En hoekom het Joost-hulle dit so voortydig vir die media vertel?” het Amor gesê.
Daardie eerste dag in die Sunninghill-hospitaal in Johannesburg het die neuroloog dr. Pieter Kritzinger haar vertel hy het die bekendste MNS, amiotrofiese laterale sklerose (ALS), by Joost gediagnoseer. Joost het self vir haar gesê hy het net 18 maande tot vyf jaar oor om te leef.
Maar dr. Jody Pearl, ’n neuroloog wat Joost op die oomblik ondersoek, het later in ’n mediaverklaring gesê dit is nog geen uitgemaakte saak wat Joost makeer nie, en sekere toetse sal eers oor sowat vier weke wys wat die finale diagnose is.
Intussen is die mense naaste aan hom, wat die meeste deur sy diagnose geraak word, in die duister oor wat werklik aangaan.
- Lees meer by Huisgenoot.com.