Amerikaanse samelewing 'gewelddadig', sê regisseur

2013-01-11 07:49

New York – Meer as ‘n dekade ná die regisseur Michael Moore sy dokumentêr Bowling for Columbine vrygestel het, wat ten gunste van wapenbeheer in die VSA is, het die regisseur gesê hy is hartseer dat die VSA nie genoeg gedoen het om geweld in skole te stop nie.

“Ek het nooit gedink dat ek ‘n dekade later hier sal staan en sê dat daardie rolprent van my niks goeds gedoen het nie. Dit is vir my hartverskeurend,” het Moore Dinsdagaand op die rooitapyt van die National Board of Review Awards gesê.

Bowling for Columbine, wat ‘n Oscar gewen het vir beste dokumentêre rolprent, is ná die skietery by Columbine Hoërskool in 1999 vrygestel.

Die nasionale debat oor wapenbeheer in die VSA het intussen weer opgevlam ná die treurspel by die Sandy Hook-skool in Newtown.

Moore het gesê hy voel steeds sekere wapens moet verban word, en dat vuurwapeneienaars lisensies behoort te hê.

“Ons moet lisensies vir wapens kry. Ek moet ‘n lisensie vir my hond hê. Ek het ‘n lisensie vir my kar, maar ons het nie ‘n lisensie vir wapens nodig nie?”

Hy het ook gesê die VSA se wapen-probleem het nie nét te make met wapenbeheer-wette nie.

“Ons is geweldadige mense,” het hy gesê.

“Ek dink ons moet na onsself begin kyk.”

– Volg Nuus24 op Twitter
 

- AP