Grapjas reël konsert vir ruimtewesens
2011-06-28 22:00
Kalifornië – ‘n Amerikaanse komediant wat homself UFO Phil
gedoop het, is besig om ‘n konsert vir ruimtewesens te organiseer, berig AOL News.
Die konsert word gereël vir 10 Junie 2012, wanneer dié wesens sal
afkom Aarde toe, sê Phil.
Verskeie mense beweer dat die wêreld in 2012
tot ‘n einde gaan kom, aangesien die antieke Maja-kalender nie verder as dié
jaar strek nie.
Maar, sê Phil, hulle is heeltemal verkeerd.
“Die 'Blue Ones' gaan dan hier aankom,” sê Phil.
Volgens Phil is hulle "goeie" ruimtewesens wat
die vooruitgang van die mens gaan help deur middel van die wonderlike tegnologie wat
hulle aan ons gaan bekendstel.
Hulle bring ook vir ons 'n nuwe kalender, sê Phil.
As ‘n gebaar van dankbaarheid komponeer Phil ‘n oorspronklike musiekstuk
genaamd “Sympnony for the Aliens”.
Die konsert word in Monterrey, Kalifornië, gehou,
waar die legendariese Monterey International Pop Music Festival in 1967 plaasgevind het.
Kliek hier vir die volledige storie.
Volg Nuus24 op Twitter.
