Alkohol wél agter Winehouse se dood

2013-01-09 10:32

Londen – Amy Winehouse is dood aan alkoholvergiftiging toe sy ná ‘n tyd van onthouding weer begin drink het, het ‘n tweede lykskouer se geregtelike doodsondersoek Dinsdag bevestig.

Die lykskouer, Shirley Radcliffe, het beslis dat die 27-jarige sangeres “dood is weens alkoholvergiftiging”. Sy het bygevoeg dat daar geen verdagte omstandighede was nie.

Sy het gesê Winehouse het “vrywilliglik alkohol ingeneem – ‘n doelbewuste daad wat ‘n onverwagte wending geneem en tot haar dood gelei het”.

Dinsdag se bevinding was identies aan die geregtelike doodsondersoek wat in 2011 gedoen is. Die uitkoms van die aanvanklike uitslae is nietig verklaar nadat gevind is dat die oorspronklike lykskouer nie die regte kwalifikasies vir die werk het nie.

Die Grammy-bekroonde kunstenaar, wat jare 'n stryd teen dwelm- en alkoholmisbruik gevoer het, is op 23 Julie 2011 dood gevind in haar huis in Londen. Leë bottels vodka het om haar gelê.

Radcliffe sê ‘n nadoodse ondersoek het getoon dat Winehouse se bloedalkoholvlak vyf keer hoër as die wettige perk om te bestuur was.

Sy het bygevoeg dat soveel alkohol die sentrale senuweestelsel in so ‘n mate kan beïnvloed dat ‘n pasiënt “aan die slaap kan raak en nie weer wakker word nie”.

– Volg Nuus24 op Twitter
 

- AP