Alec Baldwin se bekruiper wéér vas
2012-11-28 11:51
New York – 'n Aspirant-aktrise van Kanada wat daarvan beskuldig word dat sy die Amerikaanse TV-ster Alec Baldwin teister, is Dinsdag ná 'n verhoor in hegtenis geneem.
Genevieve Sabourin is in hegtenis geneem, minute ná 'n chaotiese verhoor waarin haar regsverteenwoordiger bedank het omdat hulle glo nie kon saamwerk nie.
Maurice Sercarz, die prokureur, het gesê Sabourin het "teen my raad" haar saak op Twitter en op TV bespreek. Hy het ook gesê sy is nie bereid om te onderhandel nie.
Sabourin is in boeie weggeneem en het gesê sy weet nie hoekom sy aangehou word nie.
Volgens mediaberigte in New York het sy 'n bevel om weg te bly van Baldwin, verontagsaam.
Baldwin is die ster van die televisiereeks 30 Rock.
In sommige van Sabourin se Twitter-boodskappe word Baldwin en sy vrou, 'n joga-instrukteur, se name genoem.
Baldwin het vroeër vanjaar aanklagte van teistering teen Sabourin aanhangig gemaak. Hy het haar daarvan beskuldig dat sy e-posse aan hom gestuur het, en hom gevra het om met haar te trou. Sy het glo ook ongenooid by sy woonstel in Manhattan opgedaag.
Sabourin, wat op 8 April in hegtenis geneem en 36 uur lank aangehou is, het gesê die bewerings van teistering is 'n "misverstand".
– Volg Nuus24 op Twitter
- Sapa - AFP
