Akteur ontken hy is kroeg belet
2009-08-04 06:44
Sydney. – Die Australiese akteur Russell Crowe het gister berigte ontken dat hy ná ’n twis oor toemaaktyd ’n Britse kroeg belet is.
Die Britse koerant Sunday Express het berig Crowe (45) is Brickmakers in Windelsham, Surrey, belet. Dit is naby die stel van sy nuwe fliek, Robin Hood.
’n Ongeïdentifiseerde inwoner is aangehaal dat Crowe geld aangebied het om ná sluitingstyd voort te drink, maar dit is geweier. Hy is uiteindelik daar weg en het glo op pad uit ’n bord stukkend gegooi.
’n Woordvoerder van die kroeg wou gister nie kommentaar lewer nie.
Crowe se bestuurder, mnr. Grant Vandenberg, het gesê die berig is vals. “Die enigste waarheid in die hele ding is dat hy na die kroeg is,” het hy aan die Australiese TV-diens Nine Network gesê.
“Hy was al vier of vyf keer saam met sy kinders daar. Daar is ’n speelgrond agter.”
Crowe, wat in 2001 ’n Oscar vir sy spel in Gladiator gewen het, het twee jong seuns by sy vrou, Danielle Spencer.
Die akteur was die laaste jare in ’n aantal rusies betrokke.
–Reuters