Akteur in boeie ná kroegrusie

2013-01-30 12:46

Phoenix – Die Dazed and Confused-ster Jason London is in Arizona in hegtenis geneem en van aanranding en wangedrag aangekla nadat hy in ‘n kroeg baklei het.

Die polisie beweer dat London Sondag by die Martini Ranch-kroeg in Arizona was toe ‘n ongeïdentfiseerde man gekla het dat London op hom genies het. Die man het glo daarop aangedring dat London hom om verskoning vra.

London wou egter nie om verskoning vra nie, en het die man met die vuis geslaan. Hy is toe deur veiligheidswagte uit die gebou gegooi, waarna hy met hulle ook baklei het.

Die 40-jarige akteur het egter op Twitter gesê hy is onskuldig.

“Ek sal nooit doen of sê wat hulle beweer ek gedoen het nie,” het London Dinsdag op Twitter gesê.

“Vertrou my. Die waarheid sal uitkom.”

“Een ou het gedink dat ek by sy meisie aanlê en toe takel hy my. My vrou was in die kamer langsaan en het nie eens ’n idee wat gebeur het nie. Ek haat Arizona.”

London is getroud met die aktrise Sofia Karstens.

In ‘n polisieverslag word beweer dat London dronk was tydens die voorval.

Een polisiebeampte beweer dat London, op pad na die polisiestasie agter in die voertuig in sy broek ontlas het.

– Volg Nuus24 op Twitter
 

- Reuters