Affleck verras met Golden Globe
2013-01-14 09:31
Los Angeles – Ben Affleck het Sondag die Golden Globe-toekenning vir beste regisseur gewen vir sy gyselaarsdrama Argo, al het hy nie ‘n Oscar-benoeming gekry nie.
Affleck, wat ook in Argo speel, het groot kompetisie uitgestof, insluitend Steven Spielberg vir Lincoln, Kathryn Bigelow vir Zero Dark Thirty, Ang Lee vir Life of Pi en Quentin Tarantino vir Django Unchained.
Affleck speel ‘n CIA-agent in die rolprent, wat losweg gebaseer is op gebeure in 1979, toe die CIA gepoog het om ses Amerikaanse diplomate te red uit ’n gyselaarsituasie in Iran.
Die 40-jarige Affleck het in sy aanvaardingstoespraak hulde gebring aan werklike intelligensie-agente en diplomate, insluitend die karakter wat hy vertolk het.
“Hierdie toekenning gaan eintlik oor Tony Mendez. Julle het hom gesien. Hy’s ‘n Amerikaanse held. Ons soldate oorsee... ek wil vir hulle baie dankie sê,” het Affleck gesê.
Hy het ook sy mededingers geprys.
"Kyk, ek gee nie om wat die toekenning is nie. Wanneer hulle jou name langs die name sit wat sopas gelees is, dan is dit ‘n merkwaardige ding in jou lewe. Die benoemdes het uitsonderlike talent.”
“Ek het werklik nooit gedink dat ek in dieselfde asem as hulle genoem sou word nie.”
Argo sal van die 25ste Januarie in Suid-Afrika te sien wees.
– Volg Nuus24 op Twitter
- AFP
