24 skrywers, 24 lande, maar ‘n enkele idee
2010-04-30 09:05
Kaapstad – Ek was al dikwels verbaas, nee, stomgeslaan, deur die plekke waar ek Suid-Afrikaners ontmoet.
Stap ek in die Andes-berge bo Chili, sal ‘n Suid-Afrikaner sy kop by ‘n tent uitsteek êrens aan die voet van ‘n gletser.
Verken ek die strate van Hong Kong, raps ‘n skerp Johannesburgse aksent by die nagmark my op die oor.
Dan praat ek nie eens van die VSA, Engeland, Nieu-Seeland en Australië nie.
Daar vorm die Suid-Afrikaners al hulle eie subkulture.
Louis Greenberg, samesteller van die storiebundel Home Away, was geprikkel deur dié jeukerige voete van Suid-Afrikaners.
Só geprikkel dat hy 24 Suid-Afrikaanse skrywers opdrag gegee het om ‘n storie te skryf oor 'n spesifieke ondervinding of plek in die buiteland wat húlle prikkel.
Deur hul bydraes moes die skrywers reflekteer op die konsep van Suid-Afrika as huis, en die identiteit van die Suid-Afrikaner in die wêreld.
Greenberg se versameling is ‘n kleurvolle mengelmoes van kontemporêre skrywers en stories.
Speurverhale, misterie en goeie ou reisstories deel bindwerk met zombies en Japannese veg-robotte so reg uit Robotech.
Die stories reis soms agter avontuur en nuuskierigheid aan, maar sommige van Home Away se bydraes, en bydraers, is ook in die buiteland uit ontevredenheid, selfs woede.
So word onderwerpe soos misdaad en emigrasie vervleg met humor en lekker leunstoelstories, en vermaak Greenberg se versameling nie net nie, maar ondersoek die bundel wat dit beteken om Suid-Afrikaans te wees.
Home Away strek oor 24 uur, met stories deur 24 skrywers wat in, oor of uit 24 plekke skryf.
Zukiswa Wanner begin die versameling om middernag met sy spannende kortverhaal, "To kill a politician," wat in Nairobi, Kenia, afspeel.
Die jong Kaapstadse skrywer S.A. Partridge volg met "The Expedition," waarin 'n trio verveelde tieners om 01:00 op 'n spooksoek-ekspedisie in Mauritius gaan, met nare gevolge.
So stap die uurwyser van Home Away aan terwyl Suid-Afrikaanse skrywers die leser van Australië na Peru, deur Havana en tot in Hong Kong meevoer.
Die bundel bring jong en gesoute Suid-Afrikaanse talent saam, met bydraes deur uitgewekenes, reisigers, emigrante en doodgewone vakansiegangers.
Die uiteenlopende versameling stories jel nie altyd nie, maar die konsep werk goed, met die die tydsbenadering wat as bindstof onder die wye reeks werke optree.
Die uurglas gee uiteindelik ‘n samehangendheid aan die bundel, wat andersins moontlik net té skisofrenies mog wees, en help uiteindelik die leser begryp wat dié boek wil sê: Dis dikwels ver van die huis af waar mens die beste uitsig oor jou tuiste kry.
Uitgewer: Zebra Press
Prys: R180
Formaat: Sagteband
ISBN-13: 978-1-77022-072-0
(Prys onderhewig aan verandering)
- Nuus24
Volg Nuus24 op Twitter.