2011 se Idols gaan verras
2011-06-05 07:00
Kaapstad - Sewe beoordelaars, sewe aanbieders en sewe wenners sedert Idols in 2002 begin het – en wanneer die sewende reeks Sondagaand om 17:30 op M-Net afskop, kan kykers regskuif vir nog meer drama, trane, verrassings, talent en toondowe kwê-voëls wat van dié realiteitsreeks ’n TV-treffer maak.
En moenie vanaand se walvisseun misloop nie.
Idols, wat nou al byna ’n dekade lank ’n onuitputlike bron van sukses vir die betaalkanaal is, skop die nuwe reeks vandag met die Kaapstad-oudisies af.
Dit word gevolg deur episodes in Polokwane, Durban en Johannesburg voor die gebruiklike teaterronde in Julie wanneer kykers vir hul top-tien begin stem.
Kykers sal Sondagaand die sprankelende nuwe Idols-beoordelaar Unathi Msengana ontmoet wat die omstrede Mara Louw vervang en die beoordelaarsdinamika dramaties verander.
Vir die eerste keer het Idols ’n slim en sterk, empatiese en charismatiese vroulike beoordelaar, wat die atmosfeer van die reeks heeltemal verander.
Rapport was op die stel met die eerste Kaapstad-oudisies en het gesien hoe ’n stralende Msengana die bekkige Randall Abrahams en Gareth Cliff behoorlik op hul plek sit.
Sy beskerm en bemoedig deelnemers, lewer opbouende en ingeligte kritiek en hanteer deelnemers vriendelik soos ’n gunsteling-laerskoolonderwyseres.
Die genooide beoordelaar vir die eerste episode is die sanger Danny K, wat sukkel om “nee” te sê. Hy moet bontstaan wanneer ’n teleurgestelde deelnemer hom toesnou dat sy nie van sy musiek hou nie.
Die beoordelaars se penne en papiere is ook weg en vervang deur Samsung Galaxy-tablette waarop hulle notas maak en die vervaardigers nou direk aan hulle teksboodskappe kan stuur.
Heelwat verrassings wag in die eerste episode.
Die Brothers Streep wat bekend is om hul luisterliedjies en nou internasionaal opgang maak, sing ’n tonekrul-liedjie op Idols. Die liedjie sal môre van die Idols-webruimte afgelaai kan word.
Dan is daar die verstommende walvisseun wat in sy grys “walvispak’’ vir die beoordelaars sing.
’n Gay oom in ’n pers uitrusting en sy nefie in ’n rooi kamerjas antwoord op alles “Fabulous, Darling’’.
“Idols bly voortdurend nuut en verrassend,’’ sê Ingrid Engelbrecht, M-Net-woordvoerder. “Dit bly verbasend hoeveel talent daar in die land is. Vanjaar is daar regtig jong deelnemers wat vir die eerste keer oudisies kan bywoon en regtig beïndruk. Aan die ander punt is daar diegene soos Elvis Blue wat byna te oud is en ook fantasties is. Daar is ook die gebruiklike groep uiters eksentrieke deelnemers.’’
Die Idols Extra-kanaal met bykomende beeldmateriaal begin vanaand om 19:00 24 uur van die dag op DStv-kanaal 199 uitsaai. Al die Kaapstad-oudisies word gewys.
- Rapport