007 kom skop, skiet en soen dalk in SA
2011-04-17 08:00
Johannesburg - Dele van ’n nuwe James Bond-rolprent gaan dalk in Suid-Afrika verfilm word.
Die regisseur Sam Mendes en vervaardiger Barbara Broccoli was onlangs in die land om na moontlike rolprentstelle vir die 23ste Bond-fliek te kyk.
Die voormalige Engelse krieketspeler Darren Gough het alles verklap toe hy op Twitter gesê het hy sit in die sakeklas op pad na Suid-Afrika. En langs hom sit Mendes en Broccoli ...
Die twee het glo aan Gough gesê hulle soek plekke waar hulle sekere tonele kan skiet.
Daar is lankal gerugte dat Agent 007 ook hier in Suid-Afrika die skurke ’n paar lesse wil leer.
In 2006 is planne laat vaar om tonele in Casino Royale hier te verfilm.
In Diamonds Are Forever het Bond in die storielyn Suid-Afrika besoek, maar dié tonele is eintlik in die woestyn naby Las Vegas geskiet.
Sony Pictures het bevestig Daniel Craig sal weer Bond speel.
Die verfilming begin na verwagting in November 2012, maar die naam van die rolprent is nog nie bekend gemaak nie.
- Rapport